'O bene 'e mamma
Haggio guardato 'o mare: è gruosso assaje!
Haggio guardato 'o cielo, e m'è paruto
ca nun fernesce maje!
Guardanno 'o sole, nun appena è asciuto,
haggio penzato:
e chi pò di' ca 'o sole nn' è putente?
Ma tu mare, tu cielo scunfinato,
e tu, sole, putente quanto maje,
pe' mme nun site niente :
'o bene 'e mamma è cchiù putente assaje!
Scritta da Peppino De Filippo
SEGUICI ANCHE SU...
https://latuapaginapreferita.blogspot.com/
A mamma
Essere mamma significa dolore,
vò dicere tremmà tutte 'e mumente
p'o troppo ammore.
'A vita soia
è comme 'a nu cammino,
chino 'e spine,
... ogni tanto na rosa,
ma sò sempre cchiù rare,
pò tutte spine...
Esce 'o sanghe e cammina,
nun parla,
nun s'allamenta mai.
Ma nun è sola,
tutt' 'e mamme camminano,
senza dì na parola!
Scritta da Titina De Filippo
Senza mamma
E'lacreme cchiù sincere e'chistu munno,
songo sulo 'e lacreme 'e na mamma;
pecchè si na' mamma chiagne,
gran dolore sente.
Ije si tenesse 'a mammema,
maje 'a facesse chiagnere;
pecchè 'o bene suojo nu cunosceva fine,
chesto nu me l'aggio maje scurdato;
si mo sto male sul'essa me putarria sanà.
Si tenesse a'mammema,
chi fosse cchiù felice e'me?
'e si 'a veresse e'chiagnere,
ije ne muresse 'e collera,
fosse nu tuorto ca nu me sapesso perdunà.
Ma ije nun a'tengo cchiù 'a mammà,
e de sta vita mo nu sacce c'aggio fà;
troppo lento pe me 'o tiempo passa,
penzanne 'a chelli lacreme;
ca ije 'a facette chiagnere.
Mo vogljo truvà pace,
pirciò mammà scetate pe nu mumento,
a'chistu suonno eterno;
tu ca me vuò tantu bene,
nu me venì sultanto nzuonno,
ma vieneme a'piglià:
pecchè senza 'e te,
nu vogljo cchiù campà.
Scritta da Nino Taranto
